Deungon Bismillah lon lake meuah
lon takot leupah na salah haba
Lon ulang haba rakan meutuah
saboh kisah nangroe mulia

Phon that teudong nangroe Peureulak
dudo meuhalak nanggroe Samudra
Lam ruweungnyan na nanggroe Pidie
bineh pasie na nanggroe Daya

Keurajeun Aceh teuka 'oh dudo
luah nanggro ube nyang ka
Teumpat sulotan Aceh lhe sagoe
tanoh Gayo di nanggroe antara

Siblah Timu na nanggroe Pidie
Meuriti troh u Samalanga
Abeh Pase leumah Peureulak
kuasa meuhalak u Teuming teuma

Siblah Barat na nanggroe Teunom
teumpat geu tanom meuh ngon suasa
Abeh Meulaboh Na Kuala Batee
nanggroe ji the na Leube Dapha

Abeh Trumon na nanggro Singke
teumpat lahe Syiah Kuala
Meunan keuh rakan keurajeun Aceh
ji teupeu leubeh di selat Malaka

Dari Deli hingga Asahan
hana so lawan wahe syedara
Hansep Keudah meutamah pahang
nanggroe Minang Aceh Kuasa

Nyan hikayat masa jameun
masa keurajeun nanggroe mulia
Masa peumimpin na akai budo
masa nanggroe kong kaom ulama

Wate masa nyan na Alam Peudeung
mirah meulinteung si panyang ija
Bak teungoh alam na sikrak peudeung
nyang teugah linteung mara bahaya

Teuma jino Aceh ka ubiet
leuh keunong gapiet kaphe Beulanda
Jino Aceh gadoh keurajeun
kon lage jameun cukop kuasa

Jino Aceh kon payong panji
leuh jeut keu abdi Indonesia
Meunan keuh tamse rakan meutuah
bek salah langkah pasai bendera

Bendera Aceh cit Alam Peudeung
han so linteung di dalam dada
Bek gabuek tanyo ngon pasai lambang
buet nyan reumbang amai mulia

Peu guna lambang meung tan na aso
akai budo nyang sampurna
Bek bandum pike keu pasai lambang
han so peutimang ra'yat nyang papa

Lon lake aduen - adoe meutuah
beu jeut ta teugah awak KPA
meung na salah beu ta tem ta peugah
deungon hikmah budo bahasa

Meunan keuh tanda rakan meutuah
hana payah ta meu syedara
Bek sampo rakan jak salah langkah
rakyat susah hanjeut meu-mita

Haba keuneuleuh dari lon tuan
jak tanyo rakan simpan lam dada
ta simpan beukong nyang alam peudeung
keu alat linteung kaom durhaka.

Sumber : http://krueng.org